طلعت فوق السطح هز الهوا كمى __ كل البنات اتجوزت وانا قاعده جمب امى

الموضوع دة حقيقى يا جماعة

ويهم كل البنات

خلينا نتفق الأول ان موضوع الجواز و العرسان و تأخر الجواز ده موضوع حساس جدا..

وصعب جدا انكوا تلاقوا حد بيتكلم فيه بصراحة..خصوصا بالنسبة للبنات....

لأن اللي بتتكلم فيه بصراحة يا إما بيتبصلها على إنها قليلة الأدب و ماتربتش
..يا إما على انها مسروعة ع الجواز .
.يا إما على انها بارت و مش لاقيه حد يتجوزها..عشان كده تلاقوا بنات كتير بتقول ..
جواز ايه بلا نيلة ..يعني هم اللي اتجوزوا كانوا خدوا ايه...انا قاعده في بيت أبويا معززة مكرمة ,ايه اللي يخليني أروح أتبهدل مع حد ماعرفوش..أنا ما بافكرش في الجواز دلوقتي لما أبني مستقبلي
أتحدي ان أي واحدة فيهم مايكونش طموحها الأول انها تبقى زوجه .وام

نتفق بقه على أسس تانية مهمة ....عدد البنات في مصر أكبر من عدد الرجاله

دي نقطة أساسية مش عايزة أي حد يناقشني فيها ..و سيبوكوا بقه من إحصائيات الحكومة اللي بتقولك عدد الإتنين زي بعض ..لأن دي إحصائيات عاملة بالظبط زي درجات الحرارة اللي بيعلنوها في النشرة ..يعني الناس بتحلف بالطلاق ان الحرارة أكيد فوق ال 45 ..و هما لا يمكن يزودوها عن 38..

موضوع الستات اللي بيقعدوا يخلفوا عشان يجيبوا الولد..يعني فيه عائلات كتيرة تلاقيها كده..4 بنات وولد..5بنات وولد..6 بنات وولد ..و هكذا...و تفضل الست تخلف تخلف .ما علينا ده موضوع تاني..بس أي حد بيدرس أو درس في أي كلية في جامعات مصر هيلاحظ ان عدد البنات في أي كلية أكبر من عدد الولاد .

نقطة تانية ..الرجالة بقوا حاسين بنفسهم و بيتكبروا على خلق الله من البنات ( يقعدلهم في عينهم و عافيتهم يا رب ) و تلقي الراجل قاعد هو و أمه يتشرطوا ...لازم تبقى بيضا و شعرها بني و عينيها عسلي و شبه نيللي كريم ..الله يخرب بيوتكم طب بص لنفسك يا خويا في المرايه الأول ..طب بلاش بيقولوا الراجل مايعيبوش الا جيبه ..طب شبرقنا كده و ادخل في ايدك ان شالله علبة ملبس ..ألا لأ البعيد هو و امه يروحوا يشوفوا العروسة الغلبانه اللي أهلها صارفين عليها الشئ الفلاني و مكلفين قعدة التعارف دي شئ و شويات ..رايحين إيد ورا و إيد قدام ..و البت مافيهاش أي عيب و يقولولكم ..لأ أصلها مش شبه نيللي كريم قوي ..دي قالبه شوية على نجلاء فتحي و انا مابحبش النوع ده ..تقولش حسين فهمي رايح يتقدم للبت

لأ و الأفراح ..نككككتة..زمان كنتوا تشوفوا في الأفلام العربي أي بنت تدخل فرح و هي لابسه شيك كده شوية ..يتلموا عليها الشبان و يبقوا عايزين ياكلوها .. و ما تخرجش م الفرح إلا بعريس..دلوقتي نفس التجمعات بس بالعكس ...تلاقي كل أم قاعده هي و بناتها مراقبين الشباب و ياويله اللي يعدي جنبهم...طارق ..إزيك يا ولد ..مش تيجي تسلم على بنات خالتك شوف بقوا حلوين إزاي؟...أنا مش طارق يا طنط و أنا متهيألي كده حضرتك مش خالتي ...صحيح؟ معلش يا حبيبي العتب ع النظر طب ما تعرفنا على نفسك كده ..يمكن ربنا يحبك و يبقالك نصيب معانا

طبعا الواد يا إما بيطلع يجري ..يا إما حد من صحابه بياخد باله م الكمين اللي وقع فيه ويجي ينقذه على أساس في حد عايزة و كده

طبعا ده غير اللف اللي بيقعدوا البنات يلفوه حوالين العروسة عشان يبقوا واضحين لكل اللي في القاعة من كل الجهات ..و لما بيقف اللف تلاقيهم يزقوا في بعض أو يعملوا انهم بيعدلوا للعروسة فستانها أو طرحتها عشان يطلعوا في الفيديو..و يحاولوا يطلعوا في أكبر عدد ممكن من الصور ..يمكن يعجبوا حد و يتكل على الله و ينتشلهم من عالم الآنسات

الكلام ده كله على فكرة مش المفروض تضحكوا عليه..و الله البنات دول غلابة ..زمان ما كانش مطلوب من أي بنت غير انها تحترم نفسها و تقعد في بيت أبوها و تستنا العدل اللي بيكون في الغالب من إختيار أهلها

دلوقتي الكورة بقت في ملعب البنات

طب البنات يعملوا ايه...ده غير العداد اللي بيعد من أول ماتتخرج من الجامعه ...يعني البنت تعتبر بدأت تعنس من أول ما يعدي عليها سنتين أو تلاتة متخرجه و لسه ماتخطبتش

والكلام دة من على لسان بنت بجد بتقول أنا شخصيا بدأت أحس اني هاعنس من أول ما كملت 23 سنة..طب نعمل ايه

بصراحة المجتمع المنيل اللي احنا عايشين فيه و اللي بيقيم البنت بجوازتها واللي تتجوز بسرعة تبقة شاطرة واللي تتأخر يبقى فيها عيب ..و ع الجهة التانية الراجل من حقه ينقي و يتشرط و يبقى مقطع السمكة و ديلها و يتقال عليه مفتح و مدقدق..و يبقى معدي الأربعين و من حقه يتجوز في أي وقت انشالله واحده عندها 18 سنة

و البنات غلابه و الضغط عليهم بيزيد كل يوم والناس بتحاكمهم على حاجه مالهمش يد فيها

يلا مش عايز حد من البنات تطلع فوق السطح وتقول طلعت فوق السطح هز الهوا كمى كل البنات اتجوزت وانا قاعده جمب امي.

كلامك جميل
بس عايز اوضحلك حاجه
ان الرجاله مش بيتكبرو
والدليل ان كل بنت بتقول للى عايز يجوزها انا عايزه مهر قد كده وشبكه قد كده ومتاخرقد كده
طب نجيب منين
واللى معاه بيتنطط على خلق الله ويقول انا عايزها بنت18 او 20 على الاخر
طب مالبنات هما اللى عقدوها وترجع تقول انا هعنس
طب فتحوا وشوفو الرجاله ومتدبحوهمش
واللى ابوها متريش تقعد تطلع القطط الفاطسه اللى فى الراجل

التوبيك بجد جميل جدا
ميرسى ليكى

ههههههههههههه

طلعتونا احنا الغلطانين ف الاخر

حراااااااااااااااااااااااااااااااااااااااااام ...

وشكرا على مروركم يا شباب

انا قلت التوبيك جميل فعلا اه
وده واقع
بس فى نفس الوقت انا مش موافقك ولا موافقك على كلامكم
انتى انتقدتى الولاد وهو انتقد البنات
مش كل البنات كده ومش كل الولاد كده
فى الحلو واللى مش كده
وفى الوحش اللى كده
فبجد احنا نتعلم بس ازاى نبقى كويسين
وخير الامور الوسط
وشكرا ليكم على التوبيك

الفنان كتب:

احنا نتعلم بس ازاى نبقى كويسين
وخير الامور الوسط

كلام جميل وكلام معقول ما اقدرش اقول حاجه عنه .....

شكرا اختي علي الموضوع
بس بجد السبب هو عدم مرونة الأهل في التعامل
والنظر الي ان بنتهم لازم يتجبلها احسن من
بنت الجيران مش اللي يقدر الشاب عليه

شكرا اختي علي الموضوع الرائع ولكن الان ليس الزواج المتاخر للبنات صعب لان الرجاله يعملو ايه ولا ايه ده الرجاله غلابه ومسكين والله

هو انتى فعلا عندك حق فمعظم الكلام فعلا بيحصل بس بردو البنات من حقها انها تختار وتتشرط هى كمان هى مش بايرة حتى لوعدت 23 او حتى 30 مادامت واثقه فنفسها وعارفه انها راضيه ربنا وبنت كويسه اكيد اللى هيختارها وهى تختارة يكون محظوظ

موضوع جميل تسلم الايادي