هقول بحب بلدى

عارف يا سامى احنا كشباب زعلانين اوى عشان مفيش شغل لينا بس ايه الى مخلينا زعلانين؟
الناس الى حولينا
ما احنا ممكن فعلا نشتغل اى حاجة لحد ما نشتغل بالشهاده ليه متسرعين فاننا نشتغل بالشهاده؟
الناس الى حولينا
ليه عايزين مستوى عالى فالمعيشه ؟
نظره الناس الى حولينا الى شايفين الفقر عيب
ليه الشباب عايزين شقه تمليك؟
عشان الناس الى حوليهم والى بيتقدملهم مع ان بالرضا بين الطرفين والاحترام والسعاده بينهم هيملكوا الدنيا كلها


والاعلام فمصر شغل مصالح
وعاملين زينا كلمتين يهدوهم وكلمتين يسكتوهم وكلها تجارة ومبيعات واعلانات والى يولع اكتر نسبته فالاعلانات تزيد

انا ممكن اكون خرجت بره الموضوع مش عارفه بقى تقبل مرورى

انا ليا رأي يمكن يشمئز البعض منه

لكن هو ف الاول والاخر مجرد رأي

من المنطقي ان مش دي مكانة مصر اللي تستحقها

واننا كان ممكن نبقي من اقوي البلاد اقتصاديا

بحكم موقعنا وثروات البلد

دا غير ان العمالة المصرية ليها كفائتها الكبيرة

لكن سبب فشلنا هو عدو مكنش مقدر لؤمه وقوته صح ...

احنا ليه مش مستغربين ان بلد زي اسرائيل لما غلبنها ف اكتوبر تفضل ساكته طول المده دي

وكمان ع رغم قدراتها الكبيرة وسلبيتنا كل شوية تضرب كام جندي ع حدود

وغير حادثه مدرسة بحر البقر المعروفة

ومفيش منا اي رد فعل رادع

الا ان اسرائيل رغم كل دا مافكرتش تحاربنا

ولو من باب الانتقام ورد الشرف من الهزيمة

تبقي فيها شوية سذاجه اننا نصدق اننا فضلنا 30 سنة من غير حرب ..

عشان احنا اقويا بمعاهدة سلام

لان اسرائيل لو عايزة تخون المعاهدة هتخونها وسهل عليها تعمل اي حجة وتحاربنا

للأسف اسرائيل ما حربتناش لكنها شافت حل اذكي

انها تدمرنا بنفسنا وانها قدرت تكسب راس البلد وقتها لصالحها

ثقافتنا الغريبة .. الفقر .. الجهل .. البطالة .. وتعجيز اي حد يحاول يصلح البلد

دا لو فرضا ان النظام السابق فاشل مكنش برضو هيوصل لكدا .. انما دا اسلوب هدم البلد بتطبقه اسرائيل بالنظام السابق

ابسط مثال ان اسرائيل بتعرف تتحكم ف البلد ... الغاز اللي تلت الشعب مش لاقيه وبيروح اسرائيل برخص التراب

اعتقد اني مش هبالغ

لو قولت ان ...

اسرائيل بتحتلنا من غير ماتحاربنا

جميل يا محمد بس انت مقولتش بردوا مين ادى الفرصه لاسرائيل تحتلنا من غير ما تحاربنا
على فكره يا محمد اول ما الثوره قامت اول ناس خافت هما اسرائيل نفسهم وطبعا كلنا شوفنا دا فى حورات ليهم فى التلفزيون
واول ناس زعلت على حسنى مبارك هما بردوا اسرائيل مش عشان تراب رجليه ولا حاجه بس انت وانا وكلنا عارفين ليه مش محتاج انى اعرفك

اسرائيل يا محمد كانت مصلحتها الاولى والاخيره هو بقاء النظام السابق مش هدمه لانه كان بيحققلها كل مطالبها دا حتى المقررات الدراسيه لطالبه المدارس ادخلوا فيها ووصلت ان بقا الدين الاسلامى اللى المفروض يكون اساس التعليم اصبح ماده زى اى ماده تانيه عاديه لا تضاف للمجموع فاصبحت لدى الطالب كماده الموسيقى يقراها قبل دخول الامتحان

اسرائيل عارفه كويس اوى اننا لو فكرنا نحاربها هنكسبها عشان اعوانها والخونه بتوعها خلاص راحوا
مفكرتش انت ليه اسرائيل مش بتحاربنا طالما هو سهل عليها اوى كدا وبدل ما تضرب من بره ما هو الضرب من جوا اسهل واحسن وافضل بالنسبه ليها ومش هيكون احنا يعنى احسن عندهم من العراق ولا فلسطين

يا محمد العيب موجود جوا البلد دى فينا احنا

متبقاش عامل زى اللى جوا بيته مشكله ويمشى يرمى السبب على جيرانه المشكله خرجت من جوا بيتك انت مش من عند الجيران

كانت حاجه عظيمه جدا لما قومنا بالثوره وكلنا رفعنا القبعه احتراما حتى اللى كان معترض بقا مش معترض
بس دى بلد معنده نفسها وكل حاجه وعكسها زى ما احمد حلمى ما بيقول ابقا اسمع بس اغنيه عسل اسود دى

طيب الثوره قامت وكله تمام والخونه مشيوا وجات حكومه جديده قولنا وحشه وجبنا حكومه خارجه من الميدان وطلعت بردوا وحشه طب احنا ولا عاجبنا اللى هما جابوا ولا عاجبنا اللى احنا جبناه نموت الجيش دا بقا ونخلص ولا نستورد حكومه من بره يا ترا بقا اسرائيل كانت ادخلت هنا كمان

شالوا حسنى وقالوا عايزين المشير والجيش والشعب ايد وحده جالهم الجيش رجعوا قالوا يسقط المشير نجيب رئيس مستورد بردوا ويا ترا اسرائيل بردوا ادخلت فى دا

قولنا كان فيه زمان رشوه وفساد فى المصالح الحكوميه طيب ما الخونه راحوا ولسه الفساد والرشوه موجودين هنجيب هنا بقا شعب مستورد يا ترا بقا اسرائيل ادخلت فى دا كمان

يا ناس لازم نبص فى اصل القضيه نحللها ونبسطها اكيد هنوصل لحل والحل
الشعب يريد اسقاط الشعب
يلا بقا بكره الصبح كل واحد يقوم يضرب نفسه بالقلم ويطرد نفسه من البيت عشان شايف ان نفسه احسن من نفسه
وعجبى

انا لي راي مخالف لكم خالص وهو اني شايفكم بتعتمدو علي نظرية المؤامرة زيادة عن اللزوم اسرائيل ايه وامريكا ايه المسألة اننا شايفيين ان مصر بلد قوية وتستحق انها تكون من العالم الاول وليس الثالث ولكن احنا مش بنتحرك ولا بنسعي لكدا ممكن دة يكون بسبب الفساد المستشري من 60 سنة فاتت واكتر لكن السبب التاني هو احنا نفسنا كل واحد عايز البلد تتقدم وهو قاعد في بيته لازم البلد علشان تتقدم وتخرج من عنق الزجاجة دة يكون في تعاون واصرار من الشعب علي العبور بيها للمكانة اللي تستحقها لازم نكون ايجابين ونبص للمصلحة العامة مش الخاصة ونفرض علي العالم احترامنا شوفو ماليزيا كانت ايه وبقت ايه وشوفو الهند وشوفو جنوب افريقيا اللي قطعها التمييز العنصري فين وصلت دلوقتي احنا للاسف لو فضلنا كدا كل واحد بيبص لمصلحتة او مصلحة حزبه او مصلحة قناته الفضائية هنروح في ابو نكله ومصرينا هيكون اسوأ مما تتخيلو تقبلو وجهة نظري

عندك حق يا سامى الناس دى اكتر ناس منظمين على الساحه عشان كدا فى المحافظات اللى تم فيها الانتخابات كانوا محتلين المركز الاول وايهم اعوانهم فى كل مكان

وعلى فكره يا سامى مش هو دا بس رأى الاخوان السلمين انا شوفت حوار لواحد فيهم فى التلفزيون مش فاكره مين صراحه المذيع بيقوله لو الاخوان مسكوا البلد مش هيكون فى سياحه فى البلد
كان رد الضيف دا ايه والله بجد قاله لو الاخوان مسكت البلد مكنش زمانى قاعد معاك هنا وبعنمل الحوار
يعنى مش السياحه اللى هى اساس الدخل القومى فى مصر هتضرب دا كمان وسائل الاعلام يعنى هنصبح مجتمع منغلق على نفسه ومن هنا طبعا كل وسائل الاتصال بالعالم الاخر هتنقطع يعنى هنصبح فى تخلف اكتر من اللى احنا فيه

وكمان العداله الاجتماعيه ازاى مفكرناش فيها يا ترا لو اخوان مسكوا الحكم هيكون نظام الحد الادنى والحد الاقصى ايه نظامه ولا هنرجع تانى لايام الزكاه على المسلمين والخراج لمن خارج الديانه

والمسحيين يا جماعه يرحوا فين هنا المطب بعينه لو الاخوان مسكوا الحكم كان القرار النهائى لمرشد الاخوان طيب والمسحيين كمان هتنطبق عليهم اى احكام هى دى الفتنه الطائفيه بعينها

والتعليم لو اقتصر على القران والسنه طب ازاى والعلوم التانيه دى هنستفيد منها ازاى انا مش بنكر ان القران الكريم ذكر كل النظريات اللى اتوصلنا ليها بالعلم بس يا جماعه التطبيق هيكون ازاى من غير دراسه العلوم دى هيروح فين ابو بكر الرازى وجابر بن حيان والخوارزمى وغيرهم والعلوم دى هتروح فين

يا جماعه دول ناس بتكدب باسم الدين يبقا ازاى هنتعلم منهم الدين

انا عن نفسى ضد الاخوان قلبا وقالبا وبفتخر بدا ولو مسكوا الحكم هسيب البلد احسن وامشى

ربنا يخليك يا سامى بس هى دى فعلا الحقيقه